اولمپک کامیابی کے بعد ارشد ندیم نے ایشین ایتھلیٹکس چیمپیئن شپ میں بھی پاکستان کے لیے گولڈ میڈل جیتا۔
ارشد ندیم نے ایشین ایتھلیٹکس چیمپیئن شپ میں مردوں کی جیولن فائنل میں زبردست کارکردگی کا مظاہرہ کرتے ہوئے 86.40 میٹر کی تھرو کے ساتھ گولڈ میڈل جیت کر پاکستان کا نام روشن کر دیا۔ یہ مقابلہ جنوبی کوریا کے شہر گومی میں ہوا جہاں ارشد ندیم نے اپنی بہترین تھرو کے ذریعے بھارتی کھلاڑی سچن یادو (85.16 میٹر) اور جاپان کے یوٹا ساکی یاما (83.75 میٹر) کو پیچھے چھوڑ دیا۔
ابتدائی مقابلوں میں سری لنکا کے رومیش تھارنگا پاتھیرجے بھی اچھی کارکردگی دکھا رہے تھے، لیکن ان کی تھرو 83.27 میٹر رہی جس کی وجہ سے وہ چوتھے نمبر پر آ گئے اور پوڈیم سے باہر ہوگئے۔ پاکستان کے دوسرے کھلاڑی یاسر سلطان نے بھی 75.39 میٹر کی تھرو کے ساتھ آٹھویں پوزیشن حاصل کی۔
ارشد ندیم کے کوچ سلمان بٹ نے ’ڈان‘ سے بات کرتے ہوئے کہا کہ ارشد کی کارکردگی اچھے آغاز کی نشاندہی کرتی ہے، خاص طور پر اس لیے کہ یہ ان کا اس سیزن کا پہلا مقابلہ تھا۔ اگر ہیٹس اور فائنل کے درمیان ایک دن کا وقفہ ہوتا تو وہ اپنی کارکردگی اور بھی بہتر کر سکتے تھے۔
ارشد ندیم، جنہوں نے پیرس 2024 اولمپکس میں 92.97 میٹر کی ریکارڈ تھرو کی تھی، ایشین ایتھلیٹکس چیمپیئن شپ کا 86.72 میٹر کا ریکارڈ توڑنے سے چند انچ پیچھے رہ گئے۔ انہوں نے فائنل کا آغاز معمولی انداز میں کیا، مگر آخری کوشش میں اپنی شاندار تھرو کے ذریعے گولڈ میڈل اپنے نام کر لیا۔
مقابلے کے دوران اسٹیڈیم میں ’دل دل پاکستان‘ کی گونج رہی اور پاکستانی شائقین نے بھرپور انداز میں حمایت کی۔ ارشد ندیم نے ہیٹس میں بھی 86.34 میٹر کی بہترین تھرو سے فائنل کے لیے کوالیفائی کیا تھا۔ انہوں نے انسٹاگرام پر اپنے فالوورز سے دعاؤں کی درخواست کی۔
یہ پاکستان کا ایشین ایتھلیٹکس چیمپیئن شپ میں پہلا طلائی تمغہ ہے۔ اس سے قبل پاکستان کی تیز ترین خاتون ایتھلیٹ تمیم خان نے خواتین کی 100 میٹر دوڑ میں حصہ لیا تھا۔
ارشد ندیم ستمبر میں انگلینڈ میں ہونے والی ورلڈ ایتھلیٹکس چیمپیئن شپ کی تیاری کے لیے روانہ ہوں گے۔ اس موقع پر صدر مملکت آصف علی زرداری، وزیراعظم شہباز شریف، اور دیگر اعلیٰ حکام نے ارشد ندیم کو کامیابی پر مبارکباد دی اور کہا کہ ارشد ندیم نے پاکستان کا سر فخر سے بلند کر دیا ہے۔صدر آصف زرداری اور وزیراعظم شہباز شریف نے اپنے تہنیتی پیغامات میں کہا کہ ارشد ندیم نے جیولن تھرو میں ایک بار پھر پاکستان کا نام روشن کیا ہے۔ انہوں نے فائنل سمیت پوری چیمپیئن شپ میں بہترین کارکردگی کا مظاہرہ کیا۔ ارشد ندیم کی اس شاندار کامیابی پر پوری قوم کو مبارکباد پیش کرتے ہیں اور کہا کہ ہم سب کو ارشد ندیم کی نمایاں کارکردگی پر فخر ہے۔دیگر رہنماؤں نے بھی اپنے بیانات میں کہا کہ ارشد ندیم پاکستان کے ہیرو ہیں اور قوم اس تاریخی کامیابی پر بے حد خوش ہے۔ انہوں نے کہا کہ ارشد ندیم کی یہ فتح ان کی محنت، جذبے اور عزم کا واضح ثبوت ہے۔ سیاسی رہنماؤں نے اس شاندار کامیابی پر ہر پاکستانی کی خوشی کا اظہار کیا اور کہا کہ قوم کو اپنے باصلاحیت بیٹے پر فخر ہے۔ انہوں نے مزید کہا کہ بھارت سمیت دیگر ممالک کے ایتھلیٹس کو شکست دے کر چیمپئن شپ جیتنا اور قومی پرچم کو بلند کرنا ایک بہت بڑا اعزاز ہے۔
